۸صبح، کابل: د افغانستان د فوټبال فډراسیون اعلان کړی چې د هېواد د فوټبال ملي لوبډله به د مالدیف په کوربتوب په یوه څلور اړخیز ټورنمنټ کې ګډون وکړي.
د افغانستان د فوټبال فډراسیون دوشنبه د غويي پر ۱۴مه، ویلي چې دا سیالۍ به د جون میاشتې په پیل کې ترسره شي او د همدې میاشتې تر لسمې نېټې پورې به دوام ولري.
په دې ټورنمنټ کې به د افغانستان، پاکستان او کوربه هېواد مالدیف لوبډلې ګډون ولري او د بنګلهدېش له ۲۳ کلنو کمعمره لوبډله هم د ګډونوالو له ډلې ده.
دا سیالۍ به د څو اړخیزو لوبو په بڼه ترسره شي او لوبډلو ته به دا فرصت برابر شي چې د سیمې له سیالو لوبډلو سره سیالۍ وکړي.
د افغانستان د فوټبال فډراسیون ویلي چې په دغو سیالیو کې د ګډون موخه د نورو لوبو لپاره د فرصت برابرول او د لوبغاړو د وړتیاوو ارزونه ده.
دا په داسې حال کې ده چې د افغانستان د فوټبال ملي لوبډله په وروستیو کلونو کې له بېلابېلو ستونزو سره مخ وه، خو بیا هم هڅې روانې دي څو دا لوبډله په نړیوالو سیالیو کې خپل حضور وساتي.
