تمه ده چې افغان فوټبال ملي لوبډله به د منځنۍ آسیا په لوبو کې له قرغزستان، تاجکستان او ازبکستان سره د لوبې ډګر ته ورشي.
د يادونې وړ ده چې دغه لوبې به د لیګ په بڼه ترسره شي او ۷ ورځې به دوام وکړي.
د المپيک لوبې:
درېيو افغان لوبغاړو د المپيک سياليو ته لاره پيدا کړه
معصومې علي زاده د بایسکل ځغلونې، عبدالله صدیقي د تکواندو او نګاره شاهین د جودو په برخه کې د المپیک لوبو ته لاره پیدا کړه.
دوی به په توکیو کې د المپیک په راتلونکو لوبو کې ګډون وکړي.
په ورته وخت کې د المپیک نړیوالې کميټې افغان تکواندو لوبغاړي فرزاد منصوري ته په المپيک کې د لوبېدو بلنه ورکړه.
افغان تکواندو کار فرزاد منصوري ته د توکیو په المپيک کې د لوبېدو بلنه ورکړل شوه
د توکیو د المپیکي لوبو تنظیمونکي وايي، که دا ښار د کورونا وبا د محدودیتونو له کبله له بېړني حالت سره هم مخ نه شي، دا لوبې به ترسره شي. دا لوبې چې تېر کال د کورونا ويروس له امله ځنډېدلې وې اوس ورته یوازې څو اونۍ پاتې دي.
کرېکټ:
د آی پي ال سياليو د پاتې لوبو نېټه په ډاګه شوه
د هندوستان کرېکټ غوره ليګ د ۱۴م پړاو پاتې سيالۍ به د روان زېږديز کال د سپټمبر له ۱۹مې د اکټوبر تر ۱۵مې نېټې پورې په متحده عربي اماراتو کې ترسره شي. دغه سيالۍ په هند کې د کورونا د درېيمې څپې له امله ځنډول شوې وې. په دغو سياليو کې له افغانستانه، محمد نبي، راشد خان او مجيب الرحمن لوبېږي چې درې واړه د سنرايزر حيدرآباد له لوبډلې سره دي.
د پي سي ال سيالۍ پيل شوې
د پاکستان کرېکټ غوره ليګ پاتې سيالۍ د افغانستان کرېکټ ستوري، راشد خان په ځلېدو سره پيل شوې.
راشدخان چې له لاهور قلندرز لوبډلې سره لوبېږي، د اسلام اباد يونايټيډ لوبډلې پر وړاندې ۴ اورونو کې د ۹ کمو منډو بدل کې يو لوبغاړی وسوځاوه او په وروستي اور کې ١٥ منډې پاتې وې، راشد خان راغی، درې پرلپسې څلوریزې یې ووهلې او په پنځم توپ یې لوبه د لاهور قلندرز په ګټه بشپړه کړه.
