۸صبح، کابل: د طالبانو تر کنټرول لاندې د افغانستان برېښنا شرکت ویلي چې له تاجکستان څخه هېواد ته د برېښنا د وارداتو تړون یې د یو بل کال لپاره تمدید کړی دی.
د برېښنا شرکت دوشنبه د لیندۍ پر ۵مه په یو خپاره کړي بیان کې ویلي چې دا تړون د طالبانو تر کنټرول لاندې د افغانستان برېښنا شرکت اجرائیوي رئیس عبدالباري عمر او د تاجکستان د برېښنا شرکت رئیس محمدعمر عیسازاده ترمنځ لاسلیک شوی دی.
طالبانو په دې تړاو نور جزییات نه دي وړاندې کړي.
د تاجکستان چارواکو هم تر اوسه په دې هکله څه نه دي ويلي.
تاجکستان د نورو ګاونډیو هېوادونو پر خلاف له تېرو درېیو کلونو راهیسې له طالبانو سره ښې اړیکې نه لري.
د یادونې ده چې افغانستان دا مهال شاوخوا یو زرو ۵۰۰ میګاواټه برېښنا ته اړتیا لري چې ۷۰ سلنه یې له ازبکستان، ترکمنستان، تاجکستان او ایران څخه واردېږي.
