د کابل ښار ځینې اوسېدونکي د ژمي په رانږدې کېدو سره د برېښنا له کمښت او پرچاوۍ سر ټکوي. هغوی ټینګار کوي چې له څه مودې راهیسې د برېښنا د نشتوالي له امله له ګڼو ننګونو سره مخ دي. د کابل ښار دا اوسېدونکي زیاتوي چې په ۲۴ ساعتونو کې یوازې له ۴ تر ۶ ساعتونو برېښنا لري او د منظمې برېښنا نشتوالي له ګڼو ننګونو سره مخامخ کړي دي.
د کابل ښار ځینو اوسېدونکو له ۸صبح ورځپاڼې سره په خبرو کې ټینګار کړی چې د ژمي په رانږدې کېدو سره د برېښنا پرچاوي هم ډېره شوې ده. هغوی باوري دي چې د هوا له سړېدو سره به پرچاوي نوره هم زیاته شي او اندېښمن دي چې ښايي سخت ژمی ولري.
د کابل دغو اوسېدونکو پر پخواني حکومت او طالبانو تور لګولی چې د کابل اړتیا وړ برېښنا په برابرولو کې پاتې راغلي او په دې برخه کې یې پام وړ کار نه دی کړی. هغوی وايي چې د دوبي په ګرمۍ او د ژمي په سړه هوا کې یې د برېښنا کمی له جدي ننګونو څخه ګڼل کېږي.
د کابل ښار د دیارلسمې ناحیې اوسېدونکی علياحمد په دغه ښار کې د برېښنا له پرلپسې پرچاوۍ شکایت لري. نوموړی وايي چې په ۲۴ ساعتونو کې یوازې ۴ یا ۶ ساعته برېښنا لري. د کابل ښار دا اوسېدونکی زیاتوي: «د بېبرقۍ ستونزه بيخي ډېره ده او پرچاوي یې پرلپسې دوام کوي. یوازې د شپې له اتو بجو بیا د شپې تر ناوخته برېښنا لرو، خو کله کله بیا په دې وخت کې هم برق نه راځي. تېره اوونۍ مو په دوو شپو ورځو کې یوازې درې ساعته برق درلود او هغه هم ډېر نامنظم و؛ یو ځل سهار شاوخوا یو ساعت برق راغی او یو ځل هم ماښام. اوس څو ورځې کېږي چې څلور ساعته برق لرو. خلاصه که درته ووایم چې کله برق ته اړتیا ولرو، نه شته او کله چې موږ ویده یو، برق راځي او بېرته ځي.»
جواد د کابل ښار د شپږمې ناحیې اوسېدونکی دی. نوموړی وايي چې په دې وروستیو کې په دغه ښار کې د برېښنا له پرچاوۍ تر پزې راغلي دي. هغه ادعا کړې چې د هوا له سړېدو سره هممهاله، د برېښنا له شدید کمښت سره مخامخ دي او شپې په تیاره کې تېروي. د کابل ښار دا اوسېدونکی زیاتوي: «دا د خلکو همیشنۍ ستونزه ده چې له بده مرغه له اړتیا وړ برېښنا برخمن نه یو. تاسې ګورئ چې هوا ورځ په ورځ سړېږي او د برق پرچاوي هم ډېره شوې ده. کله چې په کابل کې برق نه وي، تاسې باور وکړئ چې هر څه په ټپه درېږي، هر څه له برق سره تړلي دي.»
جواد اندېښنه ښيي چې په راتلونکې کې به د برېښنا پرچاوي له دې هم زیاته شي. نوموړی وايي: «اوس چې د سړې هوا لومړۍ شپې ورځې دي او لا ژمی پیل شوی نه دی، زه باوري یم چې هر څومره هوا سړه شي، برق به هم ورسره کم شي.»
ورته مهال، د کابل ښار اوسېدونکي بیا پخوانی حکومت او طالبان تورنوي چې د خلکو په اړتیا پوره کولو کې ناغېړي کوي او وايي چې د اړتیا وړ برېښنا پوره کولو لپاره بنسټيز کار شوی نه دی.
د کابل ښار یو اوسېدونکی چې نه یې غوښتل د نوم یادونه یې وشي، وايي: «که مخکېنی حکومت و یا اوسنی د ملایانو حکومت، دواړه د څوکۍ او خپل جیب په غم کې دي. د خلکو رنځ یوه ته هم مهم نه و او نه به وي. دواړه د شخصي ګټو په لټه دي. اوس وخت کې خلکو ته د برق لرل د اوبو او ډوډۍ په څېر دي او دا لومړنۍ اړتیا ګڼل کېږي. دا ډېره د شرم خبره ده چې په اوسني وخت کې د یوه هېواد د پلازمېنې څو میلیونه اوسېدونکي برق نه لري.»
د کابل اوسېدونکي په داسې حال کې په دغه ښار کې د برېښنا له کمښته شکایت کوي چې پر پلازمېنې سربېره د هېواد د ځینو نورو ولایتونو د برېښنا ډېره برخه له تاجکستان، ازبکستان، ترکمنستان او ایران څخه واردېږي او دا د خلکو اړتیا نه شي پوره کولای.
