۸صبح، کابل: فرانسپرېس خبري اژانس راپور ورکړی چې د اذربایجان په پلازمېنه باکو کې د اقلیمي بدلون په هکله د ۲۹مې نړیوالې غونډې په اصلي جلسو کې د طالبانو پلاوی حضور نه لري او په دې غونډه کې یې د مېلمه په توګه ګډون کړی دی.
د طالبانو د چاپېريال ساتنې رئیس مولوي مطيع الحق خالص دوشنبه د لړم پر ۲۱مه، له یاد خبري اژانس سره په مرکه کې ویلي چې اقليمي بدلون يوه نړيواله موضوع ده او دا مسایل هېڅ پوله نه لري.
خالص زياته کړې چې د طالبانو پلاوي ته د اذربايجان د چاپېريال ساتنې وزير مختار بابايوف او د اقليمي بدلون د ۲۹مې دورې غونډې د مشر له خوا بلنه ورکړل شوې ده.
د نوموړي په وينا، د دې غونډې ګډونوال بايد په خپلو پرېکړو کې د افغانستان په څېر زيانمن هېوادونه چې د اقليمي بدلون له اغېزو ډېر زيانمن شوي، په پام کې ونيسي.
طالبان د تېرو درېیو کلونو په ترڅ کې د اقلیمي بدلون په تېرو دوو نړیوالو غونډو کې چې په مصر او سعودي عربستان کې شوې وې، بلل شوي نه وو.
په دې غونډه کې به چې پرون پېل شوې، د شاوخوا ٢٠٠ هېوادونو استازي د روانې مياشتې تر ٢٢مې پورې په زيانمنو هېوادونو کې له اقليمي بدلون سره د مبارزې لپاره د ۱۰۰ مليارډو ډالرو کلنۍ بوديجې په هکله سلا مشورې وکړي.
له دې څو شېبې مخکې د طالبانو یاد چارواکي ویلي و چې د اقلیمي بدلون هېڅ پوله نه لري او اغېزې یې ښځینه او نارینه نه پېژني.
د اقلیمي کارپوهانو یوې نوې ارزونې افغانستان په نړۍ کې د اقلیمي بدلون له کبله شپږم زیانمن هېواد بللی دی.
د اقلیمي کارپوهانو په باور، تېرې څلور لسیزې په هېواد کې د د بارانونو د ورښت کچه ۲۵ سلنه شدید شوې ده.
