۸صبح، کابل: په افغانستان کې د ملګرو ملتونو د بشردوستانه مرستو د همغږۍ دفتر یا اوچا ویلي چې په دغه هېواد کې اقلیمي ناورین بشردوستانه اړتیاوې ډېرې کړې دي.
اوچا دا څرګندونې یکشنبه د مرغومې پر ۲۳مه په خپله اېکسپاڼه کې لیکلي دي.
نوموړي دفتر لیکلي چې افغانستان ته یوازې بشردوستانه مرستې بسنه نه کوي، بلکې دا هېواد له اقلیمي ناروین څخه هم کړېږي.
اوچا زیاته کړې چې افغانستان د ۱۰ هغو هېوادونو په کتار کې دی چې تر نورو ډېر له اقلیمي بدلون څخه اغېزمن دی.
د یاد بنسټ په باور، په دغه هېواد کې د هرې ورځې په تېرېدو چاپېریالي بدلونونه سختېږي.
اوچا ویلي چې سېلابونو په ۲۰۲۴ میلادي کال کې د افغانستان په ۳۴ ولایتونو کې څه باندې یو سل او ۷۰ زره وګړي اغېزمن کړي دي.
په دې ډله کې ۵۰۰ کسان مړه شوي او ۸۰۰ نور ټپيان دي.
لسګونه زره کورونه په قسمي یا کلي توګه ویجاړ شوي دي.
یاد دفتر ویلي چې دا هېواد طبیعي پېښو او بېوزلۍ له ناوړه وضعیت سره مخامخ کړی دی.
د یادونې ده چې پر افغانستان د طالبانو له بیاواکمنېدو وروسته په دغه هېواد کې بېوزلي ډېره شوې او هېواد په نړیواله کچه منزوي شوی دی.
