۸صبح، کابل: په افغانستان کې وروستیو زلزلو او پرلپسې وچکالیو سلګونه زره کسان بې ځایه کړي او د ژمي په نږدې کېدو یې سرپناه، خوړو او پاکو اوبو ته بېړنۍ اړتیا رامنځته کړې ده.
رویټرز شنبه د تلې پر ۱۲مه راپور ورکړی چې په افغانستان کې وروستیو مرګونو زلزلو څه باندې اته زره کورونه ویجاړ کړي او په کونړ کې څه باندې ۱۱ زره کسان په لنډمهالو پنډغالو کې ژوند کوي.
هغه کورنۍ چې د زلزلې او وچکالۍ له کبله بې ځایه شوې، د ژمي په نږدې کېدو سرپناه او بشردوستانه مرستو ته بېړنۍ اړتیا لري.
د سره صلیب نړیوال فدراسیون اعلان کړی چې د دوی له خوا د غوښتل شوې ۳۱ میلیونو ډالرو بودیجې یوازې یو پر درېیمه برخه برابره شوې ده.
نوموړي بنسټ زیاته کړې چې له مالي تامین پرته به د دې وړتیا ونه لري چې د کورنیو او مېرمنو لپاره اړتیا وړ سرپناه، خواړه او ملاتړ پراخ کړي.
مرستندویه بنسټونو هم خبرداری ورکړی چې اقلیمي بدلون په افغانستان کې وچکالي پراخه کړې، ورښتونه یې کم کړي او دغه راز پاکو اوبو ته یې لاسرسی محدود کړی دی.
ویل کېږي چې دا وضعیت د ناروغیو د خپرېدو، د خوړو د کمښت او د زدهکوونکو له خوا د ښوونځيو پرېښودو لامل شوی او د بېوزلو او شتمنو ترمنځ یې نابرابري لا پراخه کړې ده.
