۸صبح، کابل: د طالبانو د چاپېریال ساتنې ادارې عمومي رئیس مطیعالحق خلیلي له اقلیمي بدلون سره د مبارزې په برخه کې په سیمهییزو او نړیوالو غونډو کې د ګډون غوښتنه کړې ده.
نوموړي دا څرګندونې یکشنبه د لیندۍ پر ۱۱مه د اطلاعاتو او رسنيو په مرکز کې د يوې غونډې پرمهال مطرح کړې دي.
هغه څرګنده کړې چې د اقلیمي بدلون په ۲۹مه نړیواله غونډه (COP29) کې د طالبانو پلاوي د اقلیمي بدلون پر وړاندې د مبارزې په برخه کې د دغې ډلې له ادارو سره د تعامل، همغږۍ او همکارۍ او همداراز په سیمهییزو او نړیوالو غونډو کې د فعال ګډون غوښتنه کړې ده.
هغه زیاته کړې چې په دې غونډه کې د اقلیمي بدلون پر وړاندې د افغانستان د زیانونو په هکله خبرې شوي او همداراز طالبانو پلاوي د چاپېریال او اقلیمي بدلون د ځنډول شویو پروژو پر بیاپېلېدو ټینګار کړی دی.
ده په دې تړاو وویل: «د اقليمي بدلون په غونډه کې مو هڅه وکړه نړيواله ټولنه قانع کړو چې د اقليمي او چاپېريال بدلون موضوع له سياست سره هېڅ تړاو نه لري، بلکې دا موضوع بايد د يوې ټولنيزې او بشري ستونزې په توګه وګڼل شي.»
د یادونې ده چې د اقلیمي بدلون غونډه د اذربایجان په کوربهتوب او د څه باندې ۲۰۰ هېوادونو استازو په حضور کې د نوامبر تر ۲۲ نیټې پورې دوام درلود.
څه موده مخکې فرانسپرېس خبري اژانس راپور ورکړی و چې د طالبانو پلاوی د دې غونډې په اصلي جلسو کې حضور نه درلود او په دې غونډه کې یې د مېلمه په توګه ګډون کړی و.
