۸صبح، کابل: د افغانستان مقاومت جبهې مشر احمد مسعود په کابل کې د طالبانو له خوا د عبدالعلي مزاري څلورلارې د ویجاړېدو په غبرګون کې وايي چې د احمدشاه مسعود، برهانالدین رباني او مزاري په ګډون د «ازادۍ لارې شهیدان» د خلکو په زړونو کې ځای لري.
مسعود دا مطلب شنبه د وږي پر ۳۱مه په اېکس ټولنیزه شبکه کې لیکلی دی.
ده زیاته کړې: «د عدالت او ازادۍ لارې شهیدان لکه شهید استاد، ملي قهرمان، شهید مزاري او ټول شهیدان د قبر تېږه یا صحرايي خښته نه ده چې ورکېدو سره له منځه لاړه شي.»
د طالبانو کابل ښاروالۍ تېره شپه شپږمې امنیتي حوزې اړوند د پُل سوخته په سیمه کې د عبدالعلي مزاري په نوم څلورلارې ویجاړه کړې ده.
طالبانو تر اوسه په دې تړاو څه نه دي ویلي.
دغې ډلې تر دې مخکې هم په همدې څلورلارې کې د مزاري مجسمه ویجاړه کړې وه.
