۸صبح، کابل: مسکو ته د ملي مقاومت جبهې د مشر احمد مسعود له سفر وروسته روسیې یو ځل بیا په افغانستان کې د یوه ټولګډونه حکومت د جوړېدو غوښتنه وکړه.
د روسیې د بهرنیو چارو د وزارت ویاندې ماریا زاخارووا د چهارشنبې ورځ د وږي په ۸مه یوې خبري غونډه کې دغه هېواد ته د احمد مسعود سفر ته په اشارې سره وویل: « مسکو له طالبانو او د نورو قومونو له استازو غواړي چې د یو واقعي ټولګډونه حکومت، له ترهګرۍ سره پر مبارزې، مخدره توکو او بشري حقونه د ټینګښت لپاره خبرو اترو ته سره کیني.»
هغې همداراز ویلي، چې د طالبانو تر واک لاندې افغانستان کې لا هم ترهګریز ګواښونه، ټولنیزې او اقتصادي ستونزې او له بشري حقونو سرغړونې وجود لري.
نوموړې زیاته کړه :«که چیرې وضعیت د یوې ناسمې سناریو سره سم پرمخ لاړ شي، نړۍوال ترهګریز سازمانونه، په ځانګړې توګه داعش به له وضعیت څخه ګټه پورته کړي او له افغانستان څخه بهر په ځانګړې توګه په منځنۍ اسیا کې د لا پراخېدو پلانونه طرحه کړي.»
زاخارووا ټینګار کړی، که څه هم روسیه طالبان په رسمیت نه پېژني، خو له دې ډلې سره به خپلو همکاریو ته دوام ورکړي.
روسیې تر دې وړاندې هم په افغانستان کې د یوه ټولګډونه حکومت د جوړېدو غوښتنه کړې وه.
د یادونې وړ ده، چې د افغانستان د ملي مقاومت جبهې مشر احمد مسعود په دې وروستیو کې په مسکو کې د دغه هېواد په دولتي دوما کې د پارلمان له غړي او د عادلانه روسیې ګوند له مشر سرګي میرونوف سره ولیدل.
د خپاره شویو راپورونو پر بنسټ، په دې لیدنه کې دواړو لورو د افغانستان پر سیاسي وضعیت او د هغې د حل په هکله خبرې کړې دي.
