۸صبح، کابل: د مقاومت جبهې مشر له خلکو وغوښتل چې د نجونو پر زده کړو د بندیز په غبرګون کې خپل کورونه په ښوونځیو بدل کړي.
د مقاومت جبهې مشر احمد مسعود د پنجشنبې په سهار په یوه ټویټ کې د طالبانو د مشر ملا هبت الله اخوند زاده حکم ته له اشارې پرته د نجونو پر تعلیم د بندیز په اړه غبرګون وښود.
په دې ټویټ کې مسعود علم له رڼا او جهالت له تیارو سره پرتله کړی.
د مقاومت جبهې مشر ویلي چې د ښوونځیو او پوهنتونونو دروازې تړل کېدای شي؛ خو د علم او پوهې دروازه هېڅکله نشي تړل کېدای.
هغه له خلکو وغوښتل چې ځنډ مه کوئ ښوونځي خپلو کورونو ته یوسئ، بل ډول فکر وکړئ او بل ډول مبارزه وکړئ.
د مقاومت جبهه لومړۍ پوځي جبهه ده چې د طالبانو له واکمنۍ وروسته یې د دغې ډلې پر ضد وسله واله مبارزه پیل کړه.
