احمد ولي هوتک خپل برازیلي سیال ته ماته ورکړه

د افغانستان د آزادې مبارزې څانګې وتلي لوبغاړي احمد ولي هوتک د برازيلي لوبغاړي ليوناردو باربوسا سره په کابل کې بريا خپله کړه او افغانستان لپاره یې یو بل ویاړ وګاټه.
ليوناردو باربوسا په دې برخه کې ۲۶ بریاوې لري او له سیالۍ وړاندې يې هېڅ فکر نه کاوه چې د افغاني سیال پر وړاندې به له ماتې سره مخ شي.
دا لومړی ځل ؤ چې د ازادو مبارزې یا (MMA) یو برازیلی لوبغاړی افغانستان ته د لوبې لپاره راځي.
احمد ولي هوتک دغې سيالۍ ته له څه مودې راهيسې په چمتووالي او تمریناتو بوخت ؤ.
دغه سیالي د روان کال د سلواغې په ۲۳مه نېټه د کابل غازي سټډيوم اړوند د دې لوبو په ځانګړي جمنازيوم کې ترسره شوه چې د احمد ولي هوتک په بریا سره پای ته ورسېده.
په دې سيالۍ کې احمد ولي هوتک د لوبې په دوهم پړاو کې خپل برازيلي سيال ته کلک ګوذار ورکړ او افغانستان د امریکا د لویې وچې دغه لوبغاړی مات کړ.
ګن شمېر هېوادوال د دې په زړه پورې او له ولولو ډکې سيالۍ نندارې ته ورغلي ؤ او دا سيالۍ د یک ټلويزيون له لارې په ژوندۍ بڼه خپره شوه.
احمد ولي هوتک افغانانو ته ددې بري مبارکي ورکړه چې یو وتلي لوبغاړي ته یې ماته ورکړه.
احمد ولي هوتک د آزادې مبارزې څانګې د ملي لوبډلې غړی دی او د دغې برخې اتلولي لري. نوموړي تر دې دمه د افغانستان په استازولۍ د نړۍ په بېلابېلو هېوادونو کې سيالۍ کړې دي. ښاعلي هوتک په ۲۰۰۸ کال کې خپله لومړۍ بهرنۍ لوبه په ايران کې وکړه چې په دغو سياليو کې د نړۍ ۴۸ هېوادونو برخه لرله او نوموړي په همدې سياليو کې د اتلولۍ لومړی مقام خپل کړ.