۸صبح، کابل: باخبره سرچیني ۸صبح ورځپاڼې ته وايي، چې د طالبانو سرپرست حکومت د اجمل احمدي ۶.۵ میلیونه افغانۍ معاش د نوموړي په خپل بانکي حساب کې کنګل کړی دی.
نوموړې سرچینې د پنجشنبې پر ورځ د تلې پر دوهویشتمه وویل، دا پرېکړه په وروستیو ورځو کې نیول شوې ده.
سرچینه زیاتوي، د افغانستان بانک پخواني چارسمبالي اجمل احمدي وخت ونه موند، چې د تېښتې پر مهال خپل بانکي حساب کې افغانۍ پیسې پر ډالرو بدلې کړي او له ځان سره یې بهر ته یوسي.
ورته مهال د مرکزي بانک نویو مشرانو د دغه بانک د پنځو آمرانو په ګډون یوه کمېټه ګمارلې، ترڅو د اجمل احمدي په وخت کې شوې ګمارنې وارزوي.
دغه ګام د افغانستان بانک شاوخوا لسو پخوانیو کارکونکو له اعتراض وروسته واخیستل شو.
هغه کارکوونکي چې د اجمل احمدي له لوري ګوښه یا استعفاورکولو ته اړ شوي و، طالبانو ته یې له نوموړي سره د کارکولو د څرنګوالي په هکله شکایت کړی او بانک کې یې د بیا ګمارنې غوښتنه کړې ده.
دغه کمېټه به د پخواني چارسمبالي رییس ګمارنې ارزوي او د بانک نوي مشرتابه ته به راپور ورکوي.
له دې وړاندې داسې راپورونو و، چې اجمل احمدي د صنعت او تجارت وزارت او د افغانستان بانک له کارکوونکو سره دوه مخی چلند کوي.
اجمل احمدي د اشرف غني کورنۍ ته نږدی کس و، نوموړی تورن شوی، چې د پخواني ولسمشر سره له اړیکو یې ناوړه ګټه اخیستې ده.
نوموړي په هغه وخت کې د دغه بانک لسګونه تجربهلرونکي کارکوونکي له دندې ګوښه او یو شمېر نور یې استعفا ورکولو ته اړ کړي دي.
د موندنو له مخې اجمل احمدي د دغو کارکونکو پر ځاي، خپل نږدې کسان د رشتې خلاف او په ناقانونه ډول په کار ګمارلي دي.
په هغه وخت کې د افغانستان بانک عمومي ناظر اصیلګل توتاخیل ملت ته د دولت د ځوابویلو پروګرام کې د اجمل احمدي له ناقانونه کړنو دفاع کړې او ویلي و، چې دا ګمارنې قانوني دي.
د افغانستان بانک عمومي ناظر مسوولیت لري، چې د بانک د عامل هیات کړنې وارزوي او راپور یې د تصمیمنیونې په موخه د مرکزي بانک عالي شورا ته وړاندې کړي.
اجمل احمدي د ۱۳۹۹ په لومړیو کې د افغانستان بانک چارسمبالی وټاکل شو او ولسي جرګې ته د رایې اخیستلو لپاره ور وپېژندل شو، خو ونه توانېده رایې ترلاسه کړي.
په هغه وخت کې اشرف غني د ولسي جرګې د غړو له اعتراض سره سره نوموړی پر دغې څوکۍ پرېښود.
د یادونې وړ ده، چې د کابل له سقوط وروسته اجمل احمدي وتوانېد له کابل هوايي ډګره متحده عربي اماراتو ته وتښتي.
