د الجزیرې شبکه د ابوعاقلې د قتل دوسیه د لاهې نړیوالې محکمې ته وړاندې کوي
د راپورونو له مخې الجزیره ټلویزیوني شبکه د فلسطینۍ – امریکایۍ خبریالې شیرین ابوعاقلې د وژل کېدو دوسیه لاهه کې د جرمونو نړیوالې محکمې ته وړاندې کوي.
نړیوالو رسنیو چهارشنبه د ډسمبر پر اوومه راپور ورکړی، چې اړوند اسناد د دغې ټلویزیوني شبکې د حقوقي ډلې له خوا له څېړنې وروسته د لاهې محکمې ته وړاندې شوي دي.
د الجزیرې مدافع وکیل راډني ډیکسن د لاهې جرمونو محکمې په یوه مطبوعاتي ناسته کې ټینګار کړی دی، چې نړیواله محکمه باید د ابوعاقلې په قتل کې ښکېل کسان وپېژني.
د ویلو ده، چې دغه فلسطینۍ – امریکایۍ خبریاله د روان زېږدیز کال په مې میاشت کې لوېدیځه غاړه کې د فلسطینیانو پروړاندې د اسراییلو په پوځي عملیاتو کې په ډزو ووژل شوه.
