«یا ټول یا هېڅوک»؛ د آزاد او پرمختللي افغانستان لپاره
مدینه نیازۍ
څه د پاسه یو نیم کال کېږي چې د نجونو پرمخ د ښوونځیو دروازې تړلې دي. اوس د پوهنتونونو دروازې هم د نجونو پرمخ وتړل شول.
د یوې افغان نجلۍ په توګه له هغو کسان چې زموږ په اړه تصمیم نیسي، غواړم چې لومړی موږ د انسان په توګه ومني او وروسته نور مسایل د دین د سمو او واقعي لارښوونو له مخې وارزوي.
مخکې له هغې چې یوه ښځه وم، انسان یم او د انسانتوب پربنسټ د زده کړو، کار او په ټولنه کې د ګډون حق لرم. زه هم حق لرم چې د یوه نارینه په شان ژوند وکړم، ساه واخلم، وخاندم، وژاړم او رنګه جامې واغوندم.
په اوسني افغانستان کې داسې نه دي، ښځې د ښځینه والي له امله، د زده کړو، کار او په ټولنه کې د ګډون حق نه لري. ښځې چې کله وغواړي د حق غوښتنې غږ پورته کړي، پرې ظلم شوی او ځپل شوې دي. اوس دا ځپل او شکنجه او زندان ته اچول زیات شوي دي. له بلې خوا، تراوسه له دغو ځوانانو د حق غوښتنې غږ پورته کېږي او د آزادۍ غږ پورته کېږي. خو څوک ددغو مېرمنو غږ نه اوري او نه ددغو ښځو له درده ډکو نارو ته پام نه کوي. له دې سره سره، ښځې بیا هم خپلې لارې ته دوام ورکوي او له حق غوښتنې یو ګام هم نه شا ته کېږي او نه تسلیمېږي.
افغان مېرمنې په دې موده کې له ناڅرګند برخلیک سره مخ شوې دي؛ داسې برخلیک چې نه پوهېږم تر کومه به دوام وکړي او موږ چېرته بیایي. واقعاً په دغه راز شرایطو کې چې نه د زده کړو حق لرو او نه د کار، ډېر ګران دي. اوس ټولنه د ښځو لباره په زندان بدله شوې ده.
موږ یوازې ژوندي یوو او نفس کاږ، خو ژوند نه کوو. ژوند یوازې ژوندي پاتې کېدل او ساه اخیستل نه دي، بلکې د زده کړو، کار، هڅو او خپلو هیلو ته رسېدل دي. نجونې له دغو ټولو بې برخې دي. د پوهنتونونو او روغتیايي مرکزونو په تړل کېدو سره، نور ددغو نجونو په زړونو کې هیله نه ده پاتې شوې. بیا هم له خپل حقه دفاع کوي او پرمخ ځي ترڅو رامنځته شوې ستونزې په پياوړي نظم حل کړي او خپلې هیلې په واقعیت بدلې کړي.
زموږ وروڼه هم د خپلو خویندو له حقه د دفاع لپاره د دوی ترڅنګ درېدلي او له پخوا زیات هڅه کوي ترڅو د «ټول یا هېڅوک» په شعار سره د ښځو له حقونو دفاع وکړي.
د ټولو لپاره له یو شان وګړنیزو حقونو پرته ټولنه، یوه سوځېدلې او بې نفسه ټولنه ده. زده کړه او د برابرو حقونو لرل، د یوې پرمختللې او سوکاله ټولنې اړتیا ده. نو راځئ په ګډه او د ټولو لپاره، د «یا ټول یا هېڅوک» په شعار سره ودرېږو او د یوه آباد، آزاد او پرمختللي افغانستان لارې ته دوام ورکړو!
