۸صبح، کابل: د امریکا د بهرنیو چارو وزارت ویاند متیو مېلر وايي چې هېواد به یې د طالبانو تر کنټرول لاندې افغانستان سره خپلې همکارۍ ته دوام ورکړي.
مېلر دا څرګندونې سهشنبه د تلې پر ۱۱مه، شپه مهال د افغانستان په چارو کې د دغه هېواد ځانګړي استازي ټام وېسټ تر استعفا وروسته په یوې خبري غونډه کې مطرح کړي دي.
د امریکا د بهرنیو چارو وزارت ویاند د دې پوښتنې په ځواب کې چې ایا افغانستان د امریکا بهرني سیاست لومړیتوب دی؟ ویلي دي: «البته چې همداسې ده، موږ به له افغانستان سره خپلې همکارۍ ته دوام ورکړو. دا یو تلپاتې لومړیتوب دی.»
د هغه په وینا، له دې وروسته به د وېسټ ماموریت د افغانستان لپاره د امریکا شارژدفیره کېرن ډېکر، د افغان ښځو او نجونو لپاره د امریکا ځانګړې استازې رینا امیري او په مرکزي اسیا کې د دغه هېواد د بهرنیو چارو وزارت مرستیال جان مارک مخته وړي.
که څه هم امریکا طالبان په رسمیت نه پېژني، خو په تېرو درېیو کلونو کې یې د دغې ډلې تر کنټرول لاندې افغانستان سره میلیاردونه ډالره مرسته کړې ده.
بشري حقونو په ځانګړې توګه د ښځو او نجونو حقونو ته درناوی او په هېواد کې د یوه ټولګډوني دولت جوړول د طالبانو د رسمیتپېژندنې لپاره د امریکا مهم شرطونه دي.
