د امریکا د مذهبي ازادۍ کمېسیون: د طالبانو له واکمنۍ وروسته مذهبي لږکي د له منځه تلو له ګواښ سره مخ دي
۸صبح، کابل: د امریکا د مذهبي ازادۍ کمېسیون په خپله تازه بیانیه کې د طالبانو له واکمنۍ وروسته په افغانستان کې د مذهبي ازادیو وضعیت ته پام کړی دی.
دغه کمېسیون سه شنبه د اګسټ پر ۲۳ یوه بیانیه کې ویلي، چې د طالبانو له بیا واکمنۍ سره مذهبي ازادۍ سختې کمې شوې او ځینې مذهبي لږکي د له منځه تلو له ګواښ سره مخ دي.
دغه کمېسیون ویلي: «د مذهبي لږکیو ټولنې ځینې یې د له منځه تلو له ګواښ سره مخ دي، ځینې نور د غچ اخیستو له وېرې هڅه کوي خپله عقیده پټه کړي.»
د امریکا د مذهبي ازادۍ کمېسیون په وینا، طالبان له سني اسلام څخه د خپل محدود تفسیر په تپلو سره د مذهبي ازادیو او ټولو هغو افغانانو لپاره چې دغه تفسیر نه مني سخت ګواښ دي.
د امریکا د مذهبي ازادیو کمېسیون زیاته کړې: «د طالبانو له خوا د دیني تفسیر له تاوتریخوالي ډک پلي کولو سره مذهبي لږکي، ښځې، د ترانسجنډر ټولنې غړي او هغه افغانان، چې له اسلام څخه بل ډول تفسیر له لري تر پښو لاندې کېږي.»
دغه کمېسیون همداراز ویلي، چې طالبان د داعش ډلې د بریدونو پروړاندې د مذهبي لږکیو د امینت په تامین کې ناکام شوي دي.
د امریکا د مذهبي ازادۍ کمېسیون د دغه هېواد د بهرنیو چارو له وزارت څخه غوښتي، چې د طالبانو تر واکمنۍ لاندې افغانستان دې «له مذهبي ازادۍ د دوامداره سیستماتیکې سرغړونې له امله د اندېښنې وړ هېواد» یا CPC په توګه معرفي کړي.
دا په داسې حال کې ده، چې افغانستان کې پر هندو باورو مذهبي لږکیو له پرلپسې بریدونو وروسته د دغه مذهب وروستیو پلویانو هېواد پرېښود.
