۸صبح، کابل: د ملګرو ملتونو د سرمنشي مرستیالې امنیې محمد د طالبانو محدودیتونو ته په اشارې ویلي چې افغان ښځې دې له خپلو حقونو د محرومیت له کبله یوازې نه پرېښودل کېږي.
نوموړې شنبه د زمري پر ۲۴مه په اېکس کې لیکلي چې واک ته د طالبانو له بېرته ستنېدو پنځه کاله وروسته، افغان ښځې او نجونې لا هم د خپلو حقونو له محرومیت او د راتلونکي لپاره د هیلو او ارمانونو د ځنډېدو دروند بار پر اوږو وړي.
د ملګرو ملتونو د سرمنشي مرستیالې زیاته کړې چې افغان ښځې او نجونې لا هم له خپلو بنسټیزو حقونو، لکه زدهکړو او په اقتصادي فعالیتونو کې د ګډون له حقه محرومې دي.
مېرمن محمد ټینګار کړی چې نړیواله ټولنه دې لا هم د افغان ښځو غږ ته انعکاس ورکړي او له هغوی د ملاتړ په برخه کې دې خپل پیوستون وساتي.
له دې مخکې د بشري حقونو په څار سازمان کې د ښځو برخې مرستیالې هیدر بار په افغانستان کې د ښځو حقونو وضعیت په نړیواله کچه شدید بللی دی.
نوموړې زیاته کړې چې د نړیوالې ټولنې له خوا دغه کړکېچ ته ناکافي غبرګون، په نورو هېوادونو کې هم د ښځو حقونه ګواښي.
