۸صبح، کابل: د طالبانو د بهرنیو چارو وزیر امیرخان متقي د روسیې د لومړي وزیر له مرستیال الکسي اوورچوک سره د دوه اړخیزو همکاریو پر پراختیا خبرې کړې دي.
د طالبانو مرستیال ویاند حمدالله فطرت سهشنبه د تلې پر ۱۴مه په خپرې کړې خبرپاڼې کې لیکلي چې په دې لیدنه کې د دواړو خواوو ترمنځ د سیاسي تفاهم ترڅنګ، پر اقتصادي، سوداګریزو، ترانزیتي او انرژۍ همکاریو پر پراختیا هم بحث شوی دی.
د خبرپاڼې له مخې، متقي د دواړو خواوو ترمنځ د سیاسي اړیکو د «مثبت مسیر» د یادونې ترڅنګ د طالبانو په اړه د روسیې له سیاسته مننه کړې ده.
ورته مهال الکسي اوورچوک د اقتصادي همکاریو په برخه کې د روسیې د چمتووالي خبر ورکړی او ویلې یې دي چې اوسمهال د دواړو لوریو ترمنځ د عملي همکاریو د پیل لپاره مناسب چاپېریال برابر شوی دی.
نوموړي د ترانزیت، ترانسپورت، انرژۍ، او نورو برخو کې د ګډ کار پر پراختیا ټينګار کړی دی.
د روسیې د لومړي وزیر مرستیال هیله څرګنده کړې چې په نږدې راتلونکې کې به د دواړو خواوو ترمنځ لا ډېرې عملي اقتصادي همکارۍ رامنځته شي.
