د ملګرو ملتونو د بشري حقونو شورا په سوډان کې پر ملکیانو بریدونه غندلي او له ښکېلو غاړو یې غوښتي چې له کوم واردمخه شرطه پرته بېړنی او بشپړ اوربند ټینګ کړي.
الجزیرې سه شنبه د اکټوبر پر ۶مه، راپور ورکړ چې دغې شورا د دوشنبې په ورځ په ژنیو کې په یوه غونډه کې د ۲۸ موافقو، ۱۰ مخالفو او ۹ ممتنع رایو په ورکولو سره، د سوډان په تړاو د حقیقتموندونکې نړیوالې ډلې ماموریت وغځاوه.
دغې شورا همدا راز د اوربند د څارنې او د دغه هېواد د اساسي زیربناوو د بیا رغونې لپاره د یوه خپلواک میکانیزم د جوړېدو غوښتنه کړې ده.
د بشري حقونو شورا د سوډان د پوځ او د چټک ملاتړ (RSF) د ملیشه ځواکونو له خوا د د نړیوالو بشري حقونو نقض غندلی او پر ملکیانو یې د ړندو بریدونو، هوايي بمباریو او بې پیلوټه بریدونو په اړه یې خبرداری ورکړی دی.
دا پرېکړهلیک په داسې حال کې تصویب شوی چې د خوړو نړیوال پروګرام (WFP) اعلان کړی د شمالي کردفان په سیمه کې د خوراکي توکو پر لېږدونکي موټر د برید په پایله کې یو کس وژل شوی دی.
