۸صبح، کابل: د ملګرو ملتونو د بشري مرستو د همغږۍ دفتر (اوچا) وايي چې په افغانستان کې پر بشري اړتیاوو د غور په موخه ۱۸ میلیونه ډالره ځانګړي شوي دي.
اوچا سه شنبه د تلې پر ۱۴مه، ویلي چې دا پیسې د ملګرو ملتونو د بېړني غبرګون له مرکزي صندوق (CERF) څخه تامینېږي.
د اوچا په وینا، دا مرسته په داسې حال کې کېږي چې په دغه هېواد کې ۲۱.۹ میلیونه کسان بشري مرستو ته اړتیا لري.
دغې ادارې زیاته کړې چې تر اوسه پورې د ۲۰۲۶ کال لپاره د افغانستان د بشري پلان یوازې شاوخوا ۳۱ سلنه بودیجه ترلاسه شوې ده.
له دې سره هممهاله، په بشري چارو کې د ملګرو ملتونو د سرمنشي مرستیال ټام فلیچر اعلان کړی چې د بېړني غبرګون له مرکزي صندوقه ۱۶۰ میلیونه ډالره د ۱۲ هغو ناورینونو لپاره ځانګړي شوي چې له بودیجوي کمښت سره مخ دي.
د هغه په وینا، دا مرستې به ۸۷ میلیونه کسانو ته ورسېږي.
هغه زیاته کړې چې له دې منځه۱۰ میلیونه ډالره د دې لپاره ځانګړي شوي څو ډاډ ترلاسه شي چې معلولیت لرونکي کسان له مرستو بېبرخې نه پاتې کېږي.
