۸صبح، کابل: د افغان ښځو په چارو د امریکا ځانګړې استازې رینا امیري وايي چې د طالبانو بېامانه سیاستونه او فرمانونه دا څرګندوي چې دا ډله د افغانستان د نړیوالو ژمنو لپاره د درناوي هېڅ اراده نه لري.
امیري جمعه د لیندۍ پر ۱۶مه د اېکسپاڼې له لارې په یو خپاره کړي پیغام کې ویلي چې طالبانو په تېرو درېیو کلونو کې په تدریجي ډول د افغانانو له غوښتنو او نړیوالو فشارونو څخه سرغړونه کړې او د جنسیتي تبعیض سیاستونه یې پلي کړي دي.
هغه زیاته کړې طالبانو د ښځو فعالیتونه، تولیدات، خوځښت، زدهکړې، په عامه ځایونو کې ګډون، د ساتنې میکانیزمونو ته لاسرسی او ان د خبرو کولو وړتیا له منځه وړې ده.
د هغې په وينا، په روغتيايي انسټیټوټونو کې د نجونو پر ورتګ بندیز لګول او د ميندو او ژوند ژغورونکي روغتيايي خدمتونو په ګډون روغتيايي خدمتونو ته د هغوى له لاسرسي څخه محرومول د ټولنې د دې قشر په بشپړ ډول له منځه وړل دي.
دا په داسې حال کې ده چې طالبانو د نجونو او ښځو پر وړاندې د محدودیتونو په دوام په خپله وروستۍ پرېکړه کې نجونې په روغتیايي انسټیټوټونو کې له زدهکړو راګرځولې دي.
دغې پرېکړې پراخ غبرګونونه راپارولي دي.
