۸صبح، کابل: بښنې نړیوال سازمان ویلي چې د طالبانو امر باالمعروف او نهی عنی المنکر قانون د بشري حقونو پر وړاندې «یو څرګند برید» دی او په خبره یې، دا قانون دې په سملاسي توګه لغوه شي.
بښنې نړیوال سازمان سهشنبه د وږي پر ۶مه په خواله شبکې اېکس کې لیکلي چې دا قانون د نړیوالو قوانینو له مخې د افغانستان له ژمنو ښکاره سرغړونه کوي.
نوموړي بنسټ زیاته کړې چې دا قانون د افغان ښځو او نجونو پر وړاندې لګېدلي محدودیتونه «بنسټيزوي» او نوي محدودیتونه لکه په عام محضر کې د ښځو غږ د اخلاقي سرغړونې په توګه معرفي کوي.
یاد سازمان زیاته کړې: «اوسمهال ښځې او نجونې د نه زغم وړ محدودیتونو او پر حقونو یې له بریدونو سره مخامخې دي چې د طالبانو تر حقیقي واکمنۍ لاندې یې د ژوند ټول اړخونه اغېزمنوي.»
بښنې نړیوال سازمان ویلي چې طالبان دې د بشري حقونو تړونونو له مخې چې افغانستان لاسلیک کړي او ورته ژمن دی، درناوی، ساتنه او عمل پرې وکړي.
پرون د طالبانو ویاند ذبیحالله مجاهد ویلي و چې د امر باالمعروف او نهی عنی المنکر پر قانون اعتراض «ګستاخي» ده او په خبره یې، مسلمانان دې پر دغو قوانینو چې د «شریعت احکام» دي، ځان پوه کړي.
هغه په دې تړاو اندېښنې «بېځایه» بللي او زیاته کړې ده: «که کوم غیرمسلم د دغو قوانینو په اړه اندېښنه ښيي یا رد ورباندې کوي، لومړې دې په اسلامي قوانینو ځان پوه کړي او د اسلامي ارزښتونو درناوی دې وکړي.»
تېره ورځ په سرپل کې د طالبانو امر باالمعروف، نهی عنی المنکر او شکایتونو اورېدو وزارت سرپرست محمدخالد حنفي هم یوې ناستې ته ویلي و چې نړیواله ټولنه دې له «بېځایه نیوکو» ډډه وکړي.
