۸صبح، کابل: د افغانستان د ازادۍ جبهې خبر ورکړی چې د نورستان په کامدیش ولسوالۍ کې له طالبانو سره په نښته کې ۱۱ طالبان وژل شوي او اته نور ټپيان دي.
نوموړې جبهې چهارشنبه ماښام د تلې پر ۱۵مه په خپرې کړې خبرپاڼې کې لیکلي چې طالبانو له څو استقامتونو د ازادۍ جبهې پر ځایونو او سنګرونو بریدونه کړي دي.
نوموړې جبهې ویلي چې نښتې شاوخوا شپږ ساعته دوام کړی او دغې ډلې په پراخ غبرګوني برید سره طالبانو ته درانه تلفات اړولي دي.
په خبرپاڼه کې راغلي چې د طالبانو ټپیان د کامدیش ولسوالۍ او دغه راز د نورستان مرکز پارون ښار روغتیايي مرکزونو ته لېږدول شوي دي.
یادې جبهې ویلي چې کسان یې په کامدیش ولسوالۍ کې د دغې ډلې تر کنټرول لاندې سیمو کې په خپلو سنګرونو کې دي او د شاوخوا کلیو او سیمو پر وضعیت تسلط لري.
