۸صبح، هلمند: په هلمند کې ځايي سرچینې وايي چې طالبان معلولیت لرونکو وګړو او د وژل شویو جنګیالیو کورنیو ته شاوخوا ۱۰ زره افغانۍ امتیاز ورکوي، په داسې حال کې چې ملکیان دوه زره افغانۍ ترلاسه کوي.
سرچینو چهارشنبه د تلې پر ۱۵مه ۸صبح ورځپاڼې ته وویل چې د هغو جنګیالیو کورنۍ چې د طالبانو په صفوفو کې وژل شوي، د میاشتې له ۱۰ تر ۱۵ زرو افغانۍ ترلاسه کوي.
د سرچینو په خبره، هغه طالبان چې به جګړه کې معلول شوي هم د میاشتې ۱۰ زره افغانۍ ترلاسه کوي، خو معلولیت لرونکي ملکیانو ته د ۲۰۰ او زرو افغانیو ترمنځ ورکول کېږي.
ویل کېږي چې د وژل شویو طالبانو یا هغوی چې معلول شوي، امتیازات یې په هرو درېیو یا شپږو میاشتو کې ورکول کېږي، خو د ملکیانو بیا په ځنډ او کله کله ان یو کال هم دوام کوي.
د سرچینو په خبره، په امتیازاتو کې دا توپیر د دې لامل شوی چې په جګړه کې اغېزمنې شوې ملکي کورنۍ له ډېرو اقتصادي ستونزو سره مخ شي.
