د بښنې نړيوال سازمان له فغان حکومته وغوښتل چې هېواد کې دې د اکسيجن د کمښت ستونزه ژر تر ژره حل کړي

د بښنې نړيوال سازمان د يوې خبرپانې له لارې د افغانستان له حکومته غوښتنه کړې چې په هېواد کې دې د اکسيجن د کمښت ستونزه د نړيوالو مرستندويه بنسټونو په مرسته ژر تر ژره حل کړي.

د ياد سازمان په خبرپاڼه کې راغلي چې په افغانستان کې د کرونا درېيمه څپه په خورا چټکۍ سره په خپرېدو ده او د افغانستان دولت ته پکار ده مخکې له دې چې حالات له کنټروله ووځي، د نړيوالو مرستندويه هېوادونو او بنسټونو په همکارۍ دې په افغانستان کې د اکسيجن د کمښت ستونزه حل کړي.

دغه بنسټ داسې وخت کې په دې اړه خبرداری ورکوي، چې د افغانستان د عامې روغتيا وزارت چارواکي د کرونا درېيمې څپې د چټکې خپرېدو په اړه خبرې کوي.

د یاد وزارت سرپرست وحيد مجروح تېره ورځ د افغانستان وګړو ته په خطاب کې وويل، د خپلو روغتيا پالانو او ډاکترانو سپارښتونو او لارښوونو ته که پاملرنه ونه وکړئ، ښايي حالات نور هم کړکېچن شي.

دغه وزارت زياتوي چې، په هند او نورو هېوادونو کې د کرونا وروستي وضعیت ته په کتو سره دې افغانان د افغانستان روغتيايي سکتور سره همکاري وکړي او د روغتيا پالانو سپارښتنې دې جدي ونيسي.