۸صبح، کابل: له افغان رسنیو د ملاتړ سازمان (AMSO) اطلاعاتو د لاسرسي نړیوالې ورځې په مناسبت ویلي چې په افغانستان کې ازادو اطلاعاتو ته د خبریالانو او خلکو لاسرسی له شدیدو محدودیتونو سره مخ دی.
دغه سازمان دوشنبه د تلې پر ۶مه په خپرې کړې اعلامیې کې لیکلي چې طالبانو اطلاعاتو ته د لاسرسي ټول حقوقي او قانوني چوکاټونه لغوه کړي او تر ډېره اطلاعات، احصایې او ټولنیز حقایق پټ ساتل کېږي.
د اعلامیې په یوې برخې کې راغلي: «حکومتي ډيټا، احصایې او ټولنیز حقایق پټ ساتل کېږي او د استبدادي سلیقې له مخې یوازې یو اړخیز او غولوونکي تبلیغات خپرېږي.»
دغه بنسټ زیاته کړې چې که هر څوک یا رسنۍ خپلواکو اطلاعاتو ته د لاسرسي هڅه وکړي، له جدي ګواښ او مجازاتو سره مخ کېږي.
له افغان رسنیو د ملاتړ دغه سازمان ویلي چې په هېواد کې د اطلاعاتو د راټولولو او خبر رسولو تر ټولو لوی خنډ د طالبانو د استخباراتو او محتسبانو ناقانونه مداخله ده.
یاد بنسټ زیاته کړې چې د خبریالانو توقیف، تلاشي، سپکاوی او تر رواني او فیزیکي فشار لاندې راوستل د دې لامل شوي چې خپلواک او کره راپور ورکول ناشوني او ځان سانسوري واکمنه شي.
دغه بنسټ د بشري حقونو له نړیوالو سازمانونو او ازادو رسنیو غوښتي چې پر طالبانو حقوقي، سیاسي او ډيپلوماتیک فشارونه زیات کړي.
نوموړي سازمان پر ملګرو ملتونو هم غږ کړی چې د خبریالانو د نیونو، تاوتریخوالي او د اطلاعاتو د مخنیوي پېښې ثبت او مستندې کړي.
