۸صبح، کابل: د ملګرو ملتونو د خوړو او کرنې سازمان (فایو) په افغانستان کې له کرنیزو کاروبارونو د ملاتړ لپاره دوه میلیونه ډالر ځانګړي کړي دي.
فایو دوشنبه د لړم پر ۲۵مه اعلان کړی چې دا ملاتړ د مرستندویو بلاعوضو مرستو د پروګرام له لارې او د اسیا پراختیايي بانک په مالي ملاتړ وړاندې کېږي.
دا پروګرام د «خوراکي خوندیتوب او روغتیايي بنسټیزو خدماتو ته د لاسرسي د پیاوړتیا» پروژې په چوکاټ کې په دوو برخو کې پلي کېږي.
لومړۍ برخه د هغو شرکتونو او تولیدونکو ډلو لپاره ځانګړې شوې چې مشري یې ښځې کوي.
دویمه برخه یې د کرنې اړوند د کوچنیو او منځنیو سوداګریزو کاروبارونو ملاتړ کوي چې کورنیو بازارونو ته خدمات وړاندې کوي.
د فایو په خبره، د دغه پروګرام موخه د کرنیزو کاروبارونو د فعالیتونو پراخول او په افغانستان کې د خوړو خوندیتوب ښه کول دي.
متقاضیان کولی شي له پنځو زرو تر ۳۰ زرو ډالرو پورې د مرستې غوښتنه وکړي.
غوښتنوال د ۲۰۲۶ کال د نومبر تر ۳۰مې وخت لري خپل غوښتنلیکونه ثبت کړي.






