د سړو سیمو د ښوونځیو د کلنۍ آزموینې وخت اعلان شو

د پوهنې وزارت په سړو او ډېرو یخو سیمو کې د ښوونځیو د کلنۍ آزموینې وخت اعلان کړ.
په هغه اعلامیه کې چې د مرغومي په اوه ویشتمه نېټه د دغه وزارت له خوا خپره شوې راغلي چې د سړو سیمو د ښوونځیو کلنۍ آزموینه د روان کال د کب له لسمې تر ۲۵ نېټې اخیستل کېږي.
ددغه مهال وېش له مخې، په سړو سیمو کې له لومړي تر درېیم ټولګي پورې کلنۍ آزموینه د کب له شلمې تر پنځه ویشتمې نیټې اخیستل کېږي.
په دې توګه د پوهنې وزارت د شپې ښوونځیو له څلورم تر دوولسم ټولګي د آزموینې وخت د کب له لسمې تر ۲۵مې نېټې ټاکلی دی.
د پوهنې وزارت د اعلان پر بنسټ، په ډېرو سړو سیمو کې کلنۍ آزموینه د وري په لسمه پيل او په ۲۵مه نېټه پای ته رسېږي.
دغه وزارت ویلي چې ددې سیمو له لومړي تر درېیم ټولګي پورې کلنۍ آزموینه د وري په شلمه او له څلورم تر دوولسم ټولګي د دغې میاشتې په لسمه نېټه پیلېږي. له بلې خوا، د پوهنې وزارت ویلي چې د سړو سیمو ښوونځیو مشروطي او معذرتي آزموینې د وري په درېيمه پيل او په دیارلسمه نېټه پاي ته رسېږي. په همدې توګه په ډېرو سړو سیمو کې له لومړي تر دوولسم ټولګي پورې مشروطي آزموینې د غوايي په لومړۍ نېټه پيل او په لسمه پای ته رسېږي.
خو دا وزارت په سړو سیمو کې د ښوونځیو د لوست پيل د وري درېيمه او په ډېرو سړو سیمو کې د غوايي لومړۍ نېټه ټاکلې ده.
د پوهنې وزارت د ښوونځیو له مسوولینو غوښتي چې د مهال وېش له مخې د ۱۳۹۹ کلنۍ آزموینې واخلي او ددغه وزارت د لایحې پر بنسټ نوی ښوونیز کال پیل کړي.
د وېلو ده چې د کورونا ویروس د خپرېدو له امله د ښوونځیو درسونه په ځنډ سره پیل شول. د پوهنې وزارت د یخنۍ په پیلېدو سره ښوونځي رخصت کړل او وې ویل چې له وري میاشتې مخکې کلنۍ آزموینه اخیستل کېږي.