د ایران د بهرنیو چارو وزیر سیدعباس عراقچي وايي، تهران د قطر له لارې د هرمز تنګي د بیا پرانیستلو او د سمندري تګ راتګ د عادي کېدو لپاره اووه ورځنی طرحه وړاندې کړی او اوس یې په اړه پرېکړه له امریکا سره تړلې ده.
تسنیم خبري اژانس شنبه د اکتوبر پر ۱۷مه راپور ورکړی چې عراقچي دا څرګندونې په بغداد کې د اسلامي همکاریو سازمان د بهرنیو چارو وزیرانو شورا په غونډه کې کړې دي.
عراقچي ویلي، که چېرې اړین شرایط برابر شي ایران چمتو دی هرمز تنګی بیا پرانیزي او په اوو ورځو کې د بېړیو عادي تګ راتګ بېرته پیل کړي.
هغه زیاته کړې چې ایران په تېرو دوو کالو کې په ښه نیت خبرې وکړې؛ خو د نوموړي په وینا، هر ځل د ډیپلوماسۍ بهیر د دوام پر ځای پرې پوځي بریدونه شوي.
د ایران د بهرنیو چارو وزیر ویلي، دغو بریدونو په تهران کې ژوره بېباوري رامنځته کړې او د بیا تکرار د مخنیوي لپاره له باوري ضمانتونو پرته د خبرو بېرته پیلېدل ستونزمن دي.
عراقچي امریکا د ډیپلوماسۍ پر پرېښودو، پوځي بریدونو او اقتصادي جګړې تورنه کړې او ویلي یې دي چې ایران لا هم نړیوالو قوانینو او د ملګرو ملتونو منشور ته ژمن دی.
