د ایران د بهرنیو چارو وزیر سیدعباس عراقچي د امریکا ولسمشر ډونالډ ټرمپ څرګندونو ته په غبرګون کې ویلي چې ایرانیان تر بل هر وخت ډېر یو موټي دي.
عراقچي پنجشنبه د اپریل پر ۲۳مه په خپله اېکس پاڼه کې لیکلي چې د ایران دولتي بنسټونه په «یووالي او نظم» مخکې ځي او د فشارونو پر وړاندې همغږي دي.
نوموړي ویلي چې په ایران کې د «ډيپلوماسۍ او جګړې ډګرونه» د همغږو جبهو په څېر پر یوې لارې روان دي.
عراقچي زیاته کړې: «د اسرائیلو د ترهګریزو وژنو ناکامي دا واقعیت څرګندوي چې د ایران دولتي بنسټونه لا هم په یووالي، هدفمندۍ او نظم فعالیت کوي.»
د ایران د پارلمان رییس محمدباقر قالیباف هم ویلي چې په دغه هېواد کې د «سختدریځي» او «منځلاري» په نوم څه نه شته او ټول د یو چتر لاندې مخکې ځي.
نوموړي زیاته کړې چې ټول په ایران کې «ایراني او انقلابي» او یو موټي دي.
دا په داسې حال کې ده چې د امریکا ولسمشر ډونالډ ټرمپ ویلي چې په ایران کې «هېڅ متمرکز مشر» نه شته او د دغه هېواد د واک په جوړښت کې د سختدریځو او منځلارو ترمنځ اختلافات دوام لري.
نوموړي زیاته کړې د ایران خلک له دې کبله په ستونزه کې راګیر دي چې نه پوهېږي «مشر یې څوک دی».
