۸صبح: د ایران د بهرنیو چارو وزیر عباس عراقچي ویلي چې د ایران په اړه د امریکايي چارواکو ناسمې انګېرنې د دغه هېواد پر وړاندې د واشنګټن د سیاست د ناکامۍ لامل شوې دي.
عراقچي دا خبرې چهارشنبه د نومبر پر ۱۱مه، د امریکا د بهرنیو چارو وزیر مارکو روبیو د څرګندونو په غبرګون کې کړې دي.
روبیو تر دې وړاندې ویلي وو چې د ایران پر وړاندې اقتصادي بندیزونه او سمندري کلابندي دومره اغېزناک دي چې د دغه هېواد پر ضد د پراخو پوځي عملیاتو ترسره کولو ته اړتیا نشته.
د ایران د بهرنیو چارو وزیر زیاته کړې چې روبیو د امریکا د بهرنیو چارو د پخواني وزیر مایک پمپیو هماغه بېبنسټه څرګندونې تکراروي.
عراقچي زیاته کړې چې اته کاله وړاندې هم پمپیو ویلي وو چې ایرانیان د خوړو د برابرولو لپاره باید د سپینې ماڼۍ له لارښوونو پیروي وکړي.
هغه ویلي چې روبیو دا څرګندونې په داسې حال کې تکراروي چې د کیوبا الاصله هېوادوال یې هم د امریکا د همدې سیاست قربانیان دي.
روبیو چې کیوبا الاصله امريکايی دی، د ایران پر وړاندې د امریکا د سیاست دفاع په داسې حال کې کوي چې کیوبا هم له څو لسیزو راهیسې د واشنګټن تر بندیزونو لاندې ده.
