۸صبح، کابل: د طالبانو د بهرنیو چارو وزارت د عامه اړیکو رییس ضیا احمد تکل په ډاګه کړې چې د روسیې د لومړي وزیر اقتصادي مرستیال الکسي اوورچوک سبا کابل ته راځي.
تکل چهارشنبه د لړم پر ۲۰مه، ویلي چې اوورچوک به د یوه لوړپوړي اقتصادي پلاوي په مشرۍ کابل ته سفر وکړي.
په دې سفر کې به د طالبانو او روسیې ترمنځ د اړیکو پر پیاوړتیا خبرې وشي.
دغه راز به، دواړه لوري د اقتصادي او سوداګریزو همکاریو د پراختیا او د پانګونې د فرصتونو په اړه هم خبرې اترې وکړي.
یو شمېر روسي پانګوال او سوداګر به هم په دې سفر کې د اوورچوک ملتيا کوي.
دا سفر په داسې حال کې کېږي چې روسیه د ۲۰۲۵ کال په جولای میاشت کې لومړنی هېواد و چې د طالبانو حکومت یې په رسمیت وپېژاند.
خو طالبان لا هم د ښځو او نجونو پر حقونو د پراخو محدودیتونو او د هغوی د زدهکړو او کار د بندیز له امله له نړیوالو نیوکو سره مخ دي.
