نیول شوي طالب وسله وال: موږ ته ویل شوي ؤ چې کندهار نیول شوی دی

د کندهار ملي امنیت ریاست د ځانګړو عملیاتو پر مهال لس تنه طالب وسله وال له ماینونو سره یوځای نیولي دي.
د کندهار والي روح الله خانزاده وايي چې، د ملي امنیت ځواکونو په ځانګړي عملیاتو کي لس تنه وسله وال طالبان د کندهار ښار او يو شمېر ولسواليو کې نیولي او له دوی سره ماینونه او نور مهمات هم د امنیتي ځواکونو لاسته ورغلي دي.
نوموړي وويل، نیول شوي طالب وسله والو د کندهار ښار او ولسوالیو کي چرکي بریدونه او جګړه ييز فعالیتونه کول چې د ملي امنیت د منسوبینو د کشفي معلوماتو له مخي د يو لړ ځانګړو عملیاتو په ترڅ کې ونيول شول.
د کندهار والي څرګنده کړه چې، یادو کسانو سره ۳۲ حلقې مختلف ماینونه، ۳ میله توفنګچې او ۵ موټر سایکلونه هم د امنيتي ځواکونو لاسونو ته ورغلي دي. ښاغلي خانزاده وويل چې، له څېړونو وروسته به نیول شوي کسان عدلي او قضايي اړګانونو ته وسپارل شي.
له نیول شويو کسانو له ډلې څخه سمیع الله، لعل محمد او موسی کلیم وویل، په پاکستان کي ورته ویل شوي وه چې د ډیورنډ فرضي کرښې بلې غاړه باندې جهاد روا دی او په خبره یې چې وسله والو طالبانو د کندهار ټول ښار نیولی دی او اوس کولاي شي چې په پاکستان کي مېشت طالب وسله وال ولاړ هلته ولاړ شي.
دوی په خپلو کې څرګنده کړه، خو کندهار ته په راتګ سره ورته معلومه شوه چي ښار ټول د افغان دولت په ولکه کي دی نو له همدې امله يې په جګړه ييزو سیمو کې فعالیت پیل کړ. د دغو لسو تنو له ډلې ځینو یې ویل چې، د ښار دننه یې دولتي مامورین او نوموتې څېرې په نښه کولې او ماینونه یې ځای پر ځای کول.