د ملګروملتونو په امنیت شورا کې د افغانستان د وضعیت ارزول

د ملګروملتونو امنیت شورا د چنګاښ په لومړۍ نېټه په یوه ناسته کې د افغانستان امنیتي وضعیت ارزولی دی. د بهرنیو چارو وزارت د یوې خبرپاڼې په خپرولو سره اعلان وکړ چې د ملګروملتونو سازمان د امنیت شورا غړو په دغه ناسته کې ټینګار کړی چې د طالبانو امارت د منلو نه دی او نړیواله ټولنه یې له راستنېدو ملاتړ نه کوي.
د امریکا، بریتانیا، استونیا استازو، د افغانستان لپاره د ملګروملتونو سازمان د عمومي منشي ځانګړې استازې او د هېواد د بهرنیو چارو وزیر محمد حنیف اتمر په دغه ناسته کې ویناوې وکړې.
د بهرنیو چارو وزاررت د اعلان له مخې، د ملګروملتونو سازمان د امنیت شورا غړو پر ښوونځیو، په بغلان کې د مین پاکۍ موسسې پر کارکوونکو او د هېواد په نورو سیمو کې پر ملکي وګړو وروستي بریدونه په کلکه غندلي دي. د ملګروملتونو امنیت شورا په دې ناسته کې له افغان دولت او امنیتي او دفاعي ځواکونو او همداراز د تېرو دوو لسیزو له لاس ته راوړنو خپل ملاتړ اعلان کړی دی. د افغانستان لپاره د ملګروملتونو ځانګړې استازې دیبرالاینز د دغه سازمان د امنیت شورا په ناسته کې ویلي: «د افغانستان انعطاف منل په کلکه د آزمویښت په حال کې دي او د یو شمېر ناوړه سناریوګانو په لور د تللو احمتال هم شته.» لاینز دغې شورا ته خبرداری ورکړ، هغه څه چې په افغانستان کې پېښېږي، نړیوالې پایلې لري او د ملګروملتونو امنیت شورا باید په دې هېواد کې له شرایطو خبره وي. هغې د دغې شورا له غړو هېوادونو وغوښتل چې په سخاوتمندانه توګه له افغانستان سره بشردوستانه مرسته وکړي. د افغانستان لپاره د ملګروملتونو ځانګړې استازې د امنیت شورا په ناسته کې زیاته کړه: «زه د افغانستان خلکو ته ډاډ ورکوم چې د ملګروملتونو سازمان به دوی یوازې پرې نه ږدي او خپل کار ته به دوام ورکړي.»
د هېواد د بهرنیو چارو وزیر محمد حنیف اتمر، په دغه ناسته کې وویل چې له افغانستانه د بهرنیو ځواکونو د وتلو له پیله طالبانو ډلې تاوتریخوالی زیات کړی دی. د اتمر په وینا، طالبانو له ترهګرو ډلو سره اړیکې نه دي پرې کړې او له څو میاشتو راهیسې یې په معنی لرونکو مذاکراتو کې هم ګډون نه دی کړی.
د ملګروملتونو سازمان د امنیت شورا غړو په دغه ناسته کې د سولې د رغنده مذاکراتو پر پيلېدو چې د اوربند او دایمي سولې د راتلو لامل شي ټینګار وکړ.