اتمر: د پاکستان له همکارۍ پرته په سوله کې پرمختګ او د وینې بهېدو مخنیوی ناشونی دی

د بهرنیو چارو وزیر محمدحنیف اتمر وایي، د پاکستان له همکارۍ پرته د سولې په بهیر کې پرمختګ او د وینې تویېدو مخنیوی ناشونی دی. نوموړي چې د غبرګولي په ۱۶مه په هرات کې خبري ناستې ته خبرې کولې وویل، افغانان پوهېږي، چې د پاکستان له همکارۍ پرته د سولې په بهیر کې پرمختګ او د وینې تویېدو مخنیوی ممکن نه دی.
نوموړي زیاته کړه: «له پاکستان سره همکاري د افغان دولت او خلکو لپاره اړینه ده او په دې باور یو چې په هر حالت کې باید له پاکستان سره خبرو او همکارۍ ته دوام ورکړو.» هغه د هېواد د ملي امنیت له سلاکار حمدالله محب سره د پاکستان د دیپلماتیکو اړیکو د پرېکون په تړاو وویل، چې د ملي امنیت سلاکار څرګندونې په افغانستان کې د وینې تویېدنې د مخنیوي او په سوله کې د پرمختګ په هکله وې، چې دا دواړه د افغان دولت او خلکو اندېښنې دي.
د ښاغلي اتمر په خبره، په نړیوالو مناسباتو کې رامنځته شوی حالت داسې نه دی چې یوازې د افغانستان او پاکستان لپاره وي او نوموړی په دې حالت خواشيني څرګندوي؛ خو افغان حکومت نه غواړي دغه موضوع د دواړو دولتونو ترمنځ د همکاري په وړاندې خنډ شي.
د بهرنیو چارو وزیر ټینګار وکړ، چې امریکا ته د جمهور رییس غني پر سفر کار روان دی او د دواړو هېوادونو د بهرنیو چارو وزارتونه په دې اړه کار کوي.
د افغانستان د ملي امنیت شورا سلاکار حمدالله محب د خبرو په ځواب کې چې په ننګرهار کې یې کړې وې، د پاکستان د بهرنیو چارو وزیر شاه محمود قریشي ویلي، چې د دغه هېواد دیپلوماتیکي دستګاه د ملي امنیت شورا سلاکار سره خپلې اړېکې پرې کړې دي.
له دې وړاندې متحدو ایالتونو هم د حمدالله محب د ځينو څرګنونو له امله د یو وخت لپاره خپلې اړېکې پرې کړې وې او ښاغلي محب د امریکا او افغانستان په ځینو ګډو ناستو کې حضور نه درلود.