امریکايي رسنیو راپور ورکړی چې د چین په شمال ختیځ کې پر څلورو امریکايانو د چړې برید شوی دی.
رویټرز خبري اژانس راپور ورکړی چې دا پېښه دوشنبه د جون پر ۱۰مه د جیلین ولایت په بیشان پارک کې شوې او ټپي شوي کسان د امریکا د اېوا پوهنتون استادان دي.
د امریکا د استازو په جرګه کې د اېوا استازي ادم زبنر رویټرز ته ویلي چې د هغه ورور د دغې پېښې یو قرباني دی.
هغه زیاته کړې: «زما ورور، ډېویډ زابنر د چین په جیلین ښار کې د یوه معبد څخه د لیدنې پرمهال د چړې برید کې په لاس کې ټپي شوی دی.»
تر اوسه پر امریکايانو د برید انګېزه او د بریدګر هویت نه دی په ډاګه شوی.
د دغې پېښې په وینو لیتپیت ټپیانو ویډیو په ټولنیزو شبکو کې خپره شوې ده.
دا کسان د پوهنتون د استادانو د يوې ډلې په توګه چين ته تللي چې د جيلين ښار د بيهوا له پوهنتون ليدنه وکړي.
د امریکا په کانګرېس کې د ایوا استازې مارین میلر میکس وویل: «موږ به د مناسبو چینلونو له لارې د امریکا سفارت سره خبرې وکړو ترڅو ډاډ ترلاسه شي چې قربانیان لومړی د خپلو ټپونو لپاره کیفیت لرونکي پاملرنې ترلاسه کوي او بیا له چین څخه په داسې طریقه و اېستل شي چې له طبي پلوه ممکن وي.»
د ایوا پوهنتون ویاندې جین ویسر سېاېناېن ته ویلي چې د امریکا د بهرنیو چارو وزارت له دې پېښې خبر دی او وضعیت څاري؛ خو یاد وزارت تر اوسه په دې اړه څه نه دي ویلي.
دا برید په داسې حال کې شوی چې د تایوان پر سر د واشنګټن او بیجینګ اړیکې ښې نه دي.
داسې ښکاري چې دا برید سږکال د چین ولسمشر شي جین پینګ له خوا دغه هېواد ته د ۵۰ زره امریکایی محصلینو د زدهکړې پروګرامونو پر بلنې منفي اغېز وکړي.
