۸صبح، کابل: د استرالیا د دفاع وزارت اسناد ښيي چې د افغان قربانیانو د تاوان د ورکړې د طرحې له رامنځته کېدو دوه کاله تېر شوي، خو لا هم هېڅ پیسې نه دي ورکړل شوې.
د «د سټرډې پیپر» ورځپاڼې د راپور له مخې، د دې طرحې له پیل راهیسې چې د ۲۰۲۴ کال په نومبر کې پیل شوې، ۱۰۵ غوښتنلیکونه ثبت شوي چې ۴۵ یې رد شوي دي.
د راپور له مخې، لږ تر لږه شپږ غوښتنلیکونه د ۲۰۲۵ کال له اګست راهیسې د ارزونې لپاره لېږل شوي، خو د هېڅ یوه په پایله کې هم غرامت نه دی ورکړل شوی.
افغان قربانیانو ته د غرامت د ورکړې طرحه د استرالیا د پوځ د څېړنې د راپور له خپرېدو وروسته رامنځته شوه.
دغه راپور چې د «بریرټن راپور» په نوم پېژندل کېږي، د استرالیا د ځانګړو ځواکونو له خوا په ۲۳ پېښو کې د ۳۹ افغانانو د ناقانونه وژلو د ادعاوو په اړه باوري شواهد وړاندې کړي وو.
غلام جیلاني هم یو له قربانیانو دی. هغه په ۲۰۰۶ کال کې د ارزګان ولایت د یوې پوځي چاپې پر مهال خپله یوه سترګه له لاسه ورکړه او څو مرمۍ یې پر سینه ولګېدې.
سره له دې چې د اسټرالیا حکومت د هغه روایت نه دی رد کړی، د جیلاني د غرامت غوښتنه په دې دلیل رد شوې چې دغه پېښه د بریرټن په راپور کې نه وه ثبت شوې.
د قربانیانو د کورنیو وکیلان وايي چې د غوښتنلیکونو د څېړنې بهیر ورو او غیرشفاف دی او ډېری کورنۍ لا هم د تاوان د ورکړې په تمه دي.
