۸صبح، کابل: د افغانستان لپاره د اسټرالیا سفارت وايي چې د جنسیتي برابرۍ په برخه کې د دغه هېواد سفیرې سټېفاني کوپوس کمپبل د ملګرو ملتونو د ښځو څانګې له استازې سره په افغانستان کې د ښځو د وضعیت په تړاو خبرې کړې دي.
د افغانستان لپاره د اسټرالیا سفارت دوشنبه د لیندۍ پر ۱۹مه په خپله اېکسپاڼه کې لیکلي چې سټېفاني کوپوس کمپبل د ملګرو ملتونو د ښځو څانګې له استازې سره په افغانستان کې د ښځو او ماشومانو حقونو او د بشري حقونو پراخو ننګونو په تړاو خبرې کړې دي.
د افغانستان لپاره د اسټرالیا سفارت دا خبرې یو «تود بحث» بللی دی.
له دې مخکې د اسټرالیا د بهرنیو چارو وزارت په افغانستان کې د نجونو او ښځو پر مخ د روغتیايي انسټیټوټونو د دروازو د تړل کېدو په غبرګون کې ویلي و چې طالبانو د ښځو لپاره د زدهکړو او کار په برخه کې وروستی فرصت هم له منځه یوړ.
په افغانستان کې د بشري حقونو وضعیت په تړاو اندېښنې په داسې حال کې مخ پر زیاتېدو دي چې طالبانو د ښځو او نجونو پر مخ د انسټیټوټونو د دروازو په تړل کېدو سره د هېواد د نیمايي قشر ژوند له ګواښ سره مخ کړی دی.
