۸صبح، کابل: د ازادۍ جبهې د سیاسي کمېټې رییس داوود ناجي اعلان کړی چې د دغې جبهې نظامي برخې په زمري میاشت کې د طالبانو پر وړاندې ۲۱ بریدونه کړې دي.
ناجي دوشنبه د وږي پر ۲مه په اېکس کې لیکلي چې په دا بریدونه د افغانستان په اتو ولایتونو کې شوې دي.
د نوموړي په خبره، دا عملیات په بدخشان، بغلان، کندوز، پنجشیر، نورستان، کابل، فاریاب او ننګرهار کې شوې دي.
د ناجي په خبره، د زمري پر لومړۍ د بدخشان په زیباک کې ۲۱ طالبان وژل شوي او ۳۷ نور ټپي شوي دي.
نوموړي زیاته کړې چې د زمري پر ۲۹مه د بدخشان په زیباک کې شپږ طالبان وژل شوي او ۱۰ نور ټپيان شوي او پر همدې ورځ په بغلان کې دوه طالبان وژل شوي او یو بل ټپي شوی دی.
ناجي دا بریدونه له ازادۍ جبهې د خلکو د ملاتړ او د طالبانو پر وړاندې د جدي مبارزې نښه بللې ده.
