۸صبح، کندهار: په کندهار کې ځايي سرچینې وايي، طالبانو د درملو شرکتونو او پلورونکو اتحادیو ته خبر ورکړی چې د دغه ولایت په درملتونونو کې د پاکستاني درملو پېر او پلور منع دی.
سرچینو سهشنبه د لړم پر ۵مه له ۸صبح ورځپاڼې سره په خبرو کې ویلي چې دا پرېکړه د ملا هبتالله د دفتر په لارښوونه شوې او د ټاکل شوې مودې له پای ته رسېدو وروسته به پاتې پاکستاني درمل راټول او وبه سوځول شي.
د سرچینو په خبره، د طالبانو د خوړو او درملو ادارې په شفاهي ډول د درملو پلورونکو شرکتونو ته خبر ورکړی چې په درملتونونو کې د پاتې پاکستاني درملو له پلورلو وروسته، له دغه هېواده د نویو درملو له واردولو او بازار ته یې له وړاندې کولو ډډه وکړي.
سرچینې زیاتوي چې د پاکستاني درملو د قانوني وارداتو له بندېدو وروسته هم افغانستان ته د دغو درملو قاچاقي لېږد دوام لري.
د سرچینو په خبره، د طالبانو ځینې چارواکي هم د دغو درملو په لېږد او قاچاق کې لاس لري.
ورته مهال ځينې درمل پلورونکو شرکتونو پر دغه بندیز نیوکه کړې او ویلي یې دي چې د هېواد دننه د درملو تولیدونکې فابریکې د افغانستان د بازار ټولې اړتیاوې پوره کولی نه شي.
د درملو پلورونکو شرکتونو له طالبانو غوښتي چې د دغه بندیز تر بشپړ پلي کېدو مخکې د پاکستاني درملو لپاره مناسب بدیل برابر کړي، څو اړینو درملو ته د لاسرسي بهیر له ستونزو سره مخ نه شي.
