۸صبح، کابل: د ایران د بهرنیو چارو وزارت ویاند اسماعیل بقايي په چابهار بندر کې افغانستان ته د ځمکې د سپارلو په اړه ویلي چې دا موضوع د «ناسم پوهاوي» له امله رامنځته شوې ده.
بقايي دوشنبه د تلې پر ۲۰مه، په یوه خبري غونډه کې ویلي چې افغانستان ته د ایران د خاورې د یوې برخې د سپارلو په اړه مطرح شوې څرګندونې واقعي بنسټ نه لري.
د هغه په وینا، په رسنیو او ټولنیزو شبکو کې د دې موضوع خپرېدل د ایران د پارلمان د یوه غړي د خبرو ناسم تعبیر و.
بقايي زیاته کړې چې د بحث موضوع د سیمهییزو همکاریو په چوکاټ کې بندرونو او ازادو اوبو ته په وچه کې د راګيرو هېوادونو د لاسرسي په برخه کې مرسته ده؛ هغه طرحه چې د نوموړي په وینا، د نړۍ په بېلابېلو برخو کې عملي کېږي.
هغه ټینګار کړی چې تر اوسه د دې موضوع په اړه افغانستان ته هېڅ رسمي وړاندیز نه دی شوی او یوازې د یوې غونډې په څنډه کې ورته اشاره شوې ده.
هغه زیاته کړې ده: «دا موضوع د یوې رسمي غونډې په څنډه کې مطرح شوه چې د افغانستان یو وزیر هم پکې ګډون درلود او موږ هم اعلان وکړ چې دا موضوع به وڅېړو.»
دا څرګندونې په داسې حال کې کېږي چې تر دې وړاندې د ایران د پارلمان غړي محسن زنګنه په چابهار بندر کې افغانستان ته د څه باندې ۱۱۰ هکټاره ځمکې د ځانګړي کولو خبر ورکړی و، چې په دغه هېواد کې یې په ټولنیزو شبکو کې غبرګونونه راپارولي وو.
