۸صبح، کابل: د افغانستان لپاره د ملګرو ملتونو د بشري حقونو ځانګړي راپور ورکوونکي ریچارد بېنېټ له پاکستان څخه غوښتي چې د هغو افغانانو جبري ستنول ودروي چې ښايي له ځورونې، شکنجې یا د بشري حقونو له نورو جدي سرغړونو سره مخ شي.
بېنېټ جمعه د وږي پر ۲۷مه په اېکسپاڼه کې لیکلي چې له خطر سره مخ افغانان دې د معلوماتو وړاندې کولو، د انفرادي وضعیت د ارزونې او له جبري ستنولو څخه د خوندیتوب د ترلاسه کولو لپاره خوندي او د لاسرسي وړ لارې ته لاسرسی ولري.
نوموړي په ځانګړې توګه د ښځو او نجونو، بېسرپرسته ماشومانو، د بشري حقونو د مدافعانو، خبریالانو، دولتي کارکوونکو او د پخوانیو امنیتي ځواکونو د غړو په اړه اندېښنه څرګنده کړې ده.
بېنېټ همداراز له پاکستانه د روغتیایې او د غاښونو برخی محصلانو، په ځانګړې توګه د ښځینهوو په اړه چې په افغانستان کې یې لوړو زدهکړو ته لاسرسی په پراخه کچه محدود شوی، د جبري ستنولو په اړه اندېښنه ښودلې ده.
د ملګرو ملتونو ځانګړي راپور ورکوونکي ټینګار کړی چې د «جبري نه ستنولو» اصل دې مراعات شي او څوک دې داسې ځای ته نه ستنول کېږي چې هلته د بشري حقونو له جدي سرغړونې سره د مخ کېدو له رښتنې خطر سره مخ وي.
