۸صبح، کابل: د افغانستان لپاره د ملګرو ملتونو ځانګړي راپور ورکوونکي ریچارډ بېنېټ د جرمونو نړیوالې محکمې له خوا د طالب مشرانو د نیولو حکم «خورا مهم» بللی دی.
بېنېټ دوشنبه د تلې پر ۱۳مه په اېکس پاڼه کې لیکلي چې د دغې پرېکړې ارزښت یوازې د طالب مشرانو د نیولو حکم تر صادرولو محدود نه دی.
نوموړي زیاته کړې: «د جنسیت پر بنسټ د ځورونې او تعقیب په اړه د محکمې تحلیل او د طالبانو له تګلارو او کړنو سره یې تړاو هم خورا مهم دی.»
دا په داسې حال کې ده چې د جرمونو نړیوالې محکمې د دغې محکمې د څارنوالۍ په غوښتنه په ۲۰۲۵ کال کې د دوو طالب چارواکو د نیولو حکمونه له محرمانه حالته ایستلي دي.
د طالبانو ویاند ذبیحالله مجاهد بیا د جرمونو د نړیوالې محکمې حکم ته په غبرګون کې ویلي چې دا محکمه په رسمیت نه پېژني.
