۸صبح، کابل: په لاهه کې د جرمونو نړیوالې محکمې خبر ورکړی چې دغې محکمې د څارنوالۍ په غوښتنه د طالبانو د پوهنې وزیر حبیبالله اغا او د لوړو زدهکړو وزیر ندامحمد ندیم لپاره د نیولو حکم صادر کړی و.
د جرمونو نړیوالې محکمې دوشنبه د تلې پر ۱۳مه په یوې اعلامیې کې ویلي چې په ۲۰۲۵ کال کې د طالب چارواکو پر وړاندې صادر شوي څلور د نیولو حکمونه یې له محرمانه حالته ایستلي دي.
د اعلامیې له مخې، په ۲۰۲۵ کال کې د طالبانو د مشر هبتالله اخوندزاده او قاضي القضات عبدالحکیم حقاني د نیولو حکمونه علني شوي و.
نوموړې محکمې ویلي: «معقول دلایل شته چې ښيي دا څلور مظنونان د ځورونې په نوم د بشریت پر ضد جرمونو د امر کولو، هڅولو یا غوښتنې له امله له جزايي اړخه مسوول دي.»
د محکمې په خبره، ښځې او نجونې او هغوی چې د طالبانو له تګلارو سره همغږي نه دي، د دغو اقداماتو هدف ګرځېدلي دي.
یادې محکمې ویلي: «هغوی چې د طالبانو له خوا د نجونو او ښځو متحدان بلل شوي، د سیاسي لیدلورو له امله په نښه شوي دي.»
نوموړې محکمې زیاته کړې چې دا اقدامات د ۲۰۲۱ کال د اګست له ۱۵مې کله چې طالبان واک ته ورسېدل، پیل شوي او لږ تر لږه د ۲۰۲۵ کال د جنوري تر ۲۰مې یې دوام کړی دی.
