۸صبح، کابل: د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ له نړیوالې ټولنې غوښتي چې په افغانستان کې د طالبانو د ځپنې او بنسټيز تبعیض د عادي کېدو مخه ونیسي.
نوموړي دا څرګندونې پنجشنبه د لړم پر ۷مه د ملګرو ملتونو عمومي اسامبلې ته د خپل راپور د وړاندې کولو پر مهال کړې دي.
بېنېټ ټینګار کړی چې پر افغانستان د طالبانو له پنځه کلنې واکمنۍ وروسته، دغې ډلې نه یوازې د بشري حقونو د سیستماتیکو سرغړونو د پای ته رسولو لپاره ګام نه دی پورته کړی، بلکې ځپنه یې شدیده کړې ده.
نوموړي زیاته کړې چې د طالبانو وروستیو فرمانونو د ښځو حقونه لا کمزوري کړي او پر وړاندې یې تاوتریخوالي ته لاره برابره کړې ده.
بېنېټ ټینګار کړی چې له طالبانو سره تعامل دې د بشري حقونو په وضعیت کې له څرګند او تایید شوي پرمختګ پرته، د دې ډلې د مشروعیت لامل نه شي.
د ملګرو ملتونو ځانګړي راپور ورکوونکي له هېوادونو غوښتي چې د بشري حقونو د جدي سرغړونو د عاملانو د حساب ورکولو لپاره د جرمونو نړیوالې محکمې او د څېړنیزو میکانیزمونو له لارې ګام پورته کړي.
بېنېټ د اوږدمهال لپاره له زدهکړو د ځوان افغان نسل د محرومیت له پایلو خبرداری ورکړی دی.
نوموړي د بشري مرستو پر دوام او د زدهکړو، روغتیا، رسنیو او مدني ټولنې د ملاتړ غوښتنه کړې، په ځانګړې توګه یې د ښځو تر مشرۍ لاندې نوښتونو څخه پر ملاتړ ټینګار کړی دی.
