۸صبح، کابل: په ملګرو ملتونو کې د افغانستان د دایمي استازولۍ سرپرست نصیراحمد فایق وايي چې پر ښځو او نجونو د طالبانو د محدودیتونو دوام او له بنسټيزو حقونو د ماشومانو محرومول د یو نسل د راتلونکي فرصتونه له منځه وړي.
فایق پنجشنبه د لړم پر ۷مه په یوې اعلامیې کې ویلي چې په ۲۰۲۴ کال کې له ۷ تر ۱۸ کلونو پورې شاوخوا ۳.۸ میلیونه نجونې له زدهکړو محرومې دي.
نوموړي ویلي چې له منځنیو زدهکړو د نجونو او له لوړو زدهکړو د ښځو محرومول د هر کال په تېرېدو، افغانستان ته ژورې او پراخې پایلې لري.
فایق ټینګار کړی چې د طالبانو تګلارې له اسلامي لارښوونو، د افغانانو له دودونو او د بشري حقونو په برخه کې د دغه هېواد له نړیوالو ژمنو سره په ټکر کې دي او ودې ودرول شي.
هغه ویلي چې د ایډیالوژیکو او جهادي دیني مدرسو پراختیا، د ماشومانو کار او د طالبانو په لیکو کې د هلکانو جذب له جدي ننګونو څخه دي.
د فایق په خبره، جبري ودونه او ماشومانو ته بدني سزاوې هم په هېواد کې د اندېښنې وړ مسایل دي.
نوموړي ویلي چې افغانستان د طالبانو واک ته له رسېدو پنځه کاله وروسته هم له سیاسي، بشري حقونو، اقتصادي او بشردوستانه ناورینونو سره مخ دی.
