۸صبح، کابل: د افغانستان لپاره د ملګرو ملتونو د بشري حقونو ځانګړی راپور ورکوونکی ریچارډ بېنټ وايي چې افغان ښځې او نجونې د ترحم یا مرستې غوښتونکې نه دي بلکې غواړي حقونو ته یې پام وشي.
بېنټ شنبه د مارچ پر ۷مه، د ښځو نړیوالې ورځې په مناسبت په یوه ویډيويي پیغام کې ویلي چې افغان ښځې له نړیوالې ټولنې غواړي چې په دې برخه کې دریځ ونیسي او د ډيپلوماتیکو فشارونو له لارې یې له حقونو ملاتړ وکړي.
بېنټ تېرو څلورو کالو ته په اشاره ویلي چې طالبانو د جنسیت پر بنسټ نظام جوړ کړی، داسې نظام چې د حذف او جلاوالي پر اساس ډیزاین شوی او موخه یې پر ښځو واکمني ده.
د ملګرو ملتونو ځانګړي راپور ورکوونکي ټینګار کړی چې په نننۍ نړۍ کې داسې نظام نه شته.
نوموړي زیاته کړې چې افغان ښځې تسلیمې نه دي او د هېواد په ګوټ ګوټ ان په تبعید کې مخکښې دي، تر ځمکې لاندې ښوونځي تنظیموي، روغتیايي خدمات وړاندې کوي او له بشري حقونو سرغړونې مستندوي.
بېنټ یادونه کړې چې افغان ښځې د خپلو حقونو د غوښتنې لپاره نه ستړې کېدونکې او د هېواد د راتلونکې لپاره مبارزه کوي او له شدیدې ځپنې سربېره، هغه سازمانونه چې ښځې یې اداره کوي، لا هم خپلې چارې پر مخ وړي.
د ملګرو ملتونو ځانګړي راپور ورکوونکي خبرداری ورکړی چې له افغانستان سره د مالي مرستو کمښت به ویجاړونکي پایلې ولري او په افغانستان کې یې د ښځو په مشرۍ د مدني ټولنې له سازمانونو څخه پر ملاتړ ټينګار کړی دی.
