۸صبح، کابل: په زابل کې یوه سرچینه وايي چې د دغه ولایت په شاجوی ولسوالۍ کې د یوه ۲۸ کلن ځوان جسد چې په مرموز ډول وژل شوی، موندل شوی دی.
دغې سرچینې چې نه یې غوښتل د نوم یادونه یې وشي، دوشنبه د وږي پر ۱۶مه ۸صبح ورځپاڼې ته وویل چې دا ځوان عبدالحکیم نومېده او د کندهار ښار د پنځمې ناحیې اصلي اوسېدونکی و.
د سرچینې په خبره، نوموړي یوه موده په زابل کې درملتون درلود او خلکو ته یې روغتیايي خدمات وړاندې کول.
سرچینه وايي چې عبدالحکیم شاوخوا درې اوونۍ مخکې له کندهار څخه کار ځای ته له تګ وروسته لادرکه او جسد یې نن له غرمې مخکې د شاجوی بازار ته نږدې موندل شوی دی.
دا سرچینه زیاتوی چې نوموړی په مرموز ډول وژل شوی او مړی یې په یوې دښته کې غورځول شوی دی.
په زابل کې ځايي طالبانو هم د دې پېښې پخلی کړی او ویلې یې دي چې په دې تړاو یې درې کسان نیولي دي.
د یادونې ده چې په وروستیو میاشتو کې د افغانستان په ځينو سیمو کې د مرموزو وژنو پېښې زیاتې شوې او له کبله یې خلک اندېښمن دي.
