پر زدهکړو او په ښوونیز چاپېریال کې د نجونو پر حضور د محدودیتونو په لړ کې ځينو نجونو د مطالعې او زدهکړو د دوام لپاره د کتاب لوستلو حلقو ته مخه کړې ده. دا کړۍ چې تر ډېره په کوچنیو ډلو کې جوړېږي، د کتابونو د لوستلو، د ټولنیزو او کلتوري موضوعاتو په اړه د خبرو او د نجونو ترمنځ د نظرونو د تبادلې فرصت برابروي.
په دغو کړیو کې ځينې ګډون کوونکې نجونې وايي، د کتابونو لوستل ورته یوازې بوختیا نه ده، بلکې د زدهکړو د دوام او له ښوونیز چاپېریال سره د اړیکو ساتلو لار هم ده. هغوی د کتابونو د مطالعې ترڅنګ د ادبیاتو، تاریخ، ټولنې او خپلو ورځنیو تجربو په څېر موضوعاتو هم خبرې کوي.
د کتاب لوستلو حلقې تر ډېره په کورونو کې د څو نجونو په ګډون، شخصي کتابتونونو یا کوچنیو ښوونیزو ځایونو کې جوړېږي. د هرې کړۍ غړې یو کتاب ټاکي او تر لوستلو وروسته یې د منځپانګې په اړه بحث کوي. ځینې حلقې په حضوري ډول او ځینې نورې د ټولنیزو شبکو له لارې پر لیکه جوړېږي. نجونې وايي، په انلاین ډول د داسې ناستو جوړولو ورسره مرسته کړې چې له تګ راتګ پرته د مطالعې په پروګرامونو کې ګډون وکړي.
«کتاب لوستنه د دې لامل کېږي چې احساس کړم لا هم پر زدهکړو بوخته یم»
یسنا (مستعار نوم) چې د کتاب لوستلو په یوې حلقې کې ګډون کوي، وايي چې په ډلهییزه توګه مطالعې ورسره د کتاب لوستلو په برخه مرسته کړې ده. هغه وايي: «کله چې یوازې کتاب لولم، کله کله له څو مخونو وروسته ستړې شم او کتاب یو اړخ ته کړم؛ خو کله چې له څو نورو کسانو سره د یوه کتاب د لوستلو ژمنه وکړو، د مسوولیت احساس مې زیاتېږي. له مطالعې وروسته د کتاب په اړه خبرې هم کوو او هره یوه خپل نظر څرګندوي.»
د نوموړې په خبره، دغو ناستو د مطالعې فرصت له برابرولو سربېره، د خبرو او له بېلابېلو لیدلورو سره د بلدتیا لار هم برابره کړې ده.
رقیه (مستعار نوم) چې د کتاب لوستلو په یوې انلاین حلقې کې ګډون کوي، وايي چې دې کړۍ ته تر ورګډېدو مخکې یې ډېر کتابونه یوازې لوستل. هغه وايي: «د کتاب لوستلو په کړۍ کې راته مهمه نه ده چې یوازې کتاب لولم. کله چې د یوې موضوع په اړه خبرې کوو، پوهېږم چې ښايي بېلابېل کسان یو متن په بېلابېلو بڼو درک کړي.» رقیه زیاتوي چې د کتابونو په اړه خبرو ورسره مرسته کړې، څو د نظر څرګندولو او د نورو د لیدلورو د اورېدو وړتیا هم تمرین کړي.
له مطالعې سره د نجونو له لېوالتیا سربېره، ځينو کتابونو ته لاسرسی ننګونه ګڼل کېږي. د کتابونو لوړې بیې، د مجهزو کتابتونونو کمښت او ځینو سرچینو ته د لاسرسي محدودیت هغه ستونزې دي چې هغوی یې یادونه کوي.
د کتاب لوستلو د یوې حلقې غړې بهار وايي چې د ډلې غړې کله کله د یوه ځانګړي کتاب په موندلو کې له ستونزو سره مخ کېږي. هغه وايي: «کله کله داسې کتاب ټاکو چې د چاپ شوې نسخې موندل یې ستونزمن وي. په داسې مواردو کې بیا که یې قانوني برېښنايي نسخه وي، ترې ګټه اخلو؛ که نه، نو پر ځای یې بل کتاب ټاکو.»
انلاین کتاب لوستل
د انټرنېټ د کارونې له پراختیا سره، د کتاب لوستلو ځینې حلقې مجازي چاپېریال ته لېږدېدلې دي. د دغو ډلو غړې کتابونه لولي او بیا په ټاکلي وخت کې د غږیزو او انځوریزو اړیکو یا انلاین ګروپونو له لارې د کتابونو په اړه خبرې کوي.
د انټرنېټ کمزوری کیفیت، د انټرنېټ د لګښتونو برابرول او د برېښنا پرې کېدل هغه ستونزې دي چې انلاین ناستې ورسره مخ دي. ګلثوم (مستعار نوم) چې په دغو حلقو کې ګډونواله ده، وايي: «کله چې انټرنېټ ښه نه وي، نه شو کولی بحث په منظم ډول روان وساتو. کله کله د انټرنېټ یا برېښنا د ستونزې له امله ناسته نیمګړې پاتې شي.»
د ځینو نجونو لپاره د کتاب لوستنې حلقې یوازې د کتاب لوستلو ځای نه دی. هغوی په دغو ناستو کې د خپلو شخصي تجربو، ټولنیزو موضوعاتو او کلتوري مسایلو په اړه هم خبرې کوي. د دغو کړیو غړې وايي چې په داسې ډلو کې ګډون ورسره مرسته کوي، څو له مطالعې او زدهکړې سره خپله اړیکه وساتي او ترڅنګ یې له همفکرو سره هم په اړیکه کې پاتې شي.
په داسې شرایطو کې چې ځينې نجونې له ښوونیزو محدودیتونو سره مخ دي، د کتاب لوستلو حلقې ورته د مطالعاتي فعالیتونو د دوام یوه لار ګرځېدلې؛ که څه هم دا کړۍ د رسمي زدهکړو ځای نه شي ډکولی.
په دغو پروګرامونو کې ګډون کوونکې نجونې کتابونو ته د لاسرسي د پراخېدو، د نورو کتابتونونو د جوړېدو او د مطالعې او خبرو لپاره د خوندي فرصتونو د برابرېدو غوښتنه کوي. هغوی وايي، د مطالعې دوام د ښوونیزو مهارتونو په خوندیتوب او د نجونو ترمنځ د پوهې او پوهاوي په پراخولو کې مرسته کولی شي.
